في يوم من الأيام بعد العصر

 *في يوم من الأيام بعد العصر*

أسماء مع نفسها كدا بصوت مسموع لها: أنا مقتنعة بالموضوع، وهتكلم مع بابا، يارب يوافق يا رب.

أسماء: بابا، أنا عايزه أخد رأيك في موضوع كدا.

بابا: نعم يا سمسم، قولي عاوزه ايه؟

أسماء: أنا قررت...

بابا مقاطعًا مبتسمًا: ما شاء الله، بنتنا كبرت وبقت تقرر قرارات، قولي يا ست سمكة.

أسماء: يا بابا أستنى إهدى عليَّا، وبعدين أنا كبرت طبعًا، ولا أنت مش واخد بالك.

 بابا: لا واخد واخد، قولي خير ياحبيبتي، أنا سامعك.

أسماء: أنا عاوزه ألبس النقاب.

بابا: ما شاء الله، بس ده قرار صعب؛ لأن أنتِ عارفه لو لبستيه مش هتقلعيه تاني؛ ففكري كويس.

أسماء: أنا فكرت، واشتريته كمان.

بابا: أنا ما عنديش اعتراض طالما شيء يفرحك، ربنا يثبتك عليه.

أسماء: بجد يا بابا، أنا فرحانة أوي.

بابا: بجد يا سمسم، أهم شيء الإلتزام بيه.

أسماء بابتسامه: طبعًا، ربنا يقدرني يارب وأكون عند حسن ظنك.

أسماء: هروح أفرح ماما، وعمتو.

*أسماء ماشية وهي كلها سعادة إنها قدرت تحقق حلم حياتها، من صغرها، وهي بتحب النقاب، واللي بيلبسوا النقاب*

أسماء بتنادي: ماما، يا مماتي، ياست الكل، ياحياتي، وضحك وفرفشة فالصوت، أنتِ فيييين.

ماما مستغربة: أنا هنا يا أسماء يابنتي، خير مالك.

أسماء: بابا وافق ياست الكل، وافق مش مصدقة، هاتي بوسة بقا بالمناسبة الحلوة دي.

ماما بسعادة وفرحة: بجد ماشاء الله، بنتي كبرت وهتلبس النقاب، الله أكبر، ربنا يقدرك ويعينك، بس نلتزم بقا، وأحلى بوسة لكتكوتي القمر.

أسماء: حاضر ياماما على أقد مقدر هلتزم، وربنا يهدينا.

*عمت أسماء موجودة، ومش عاجبها الحوار كله، وشايفة النقاب مش فرض وإن أسماء صغيرة.*

أسماء لعمتها معاتبة: ايه ياعمتو مافيش مبروك؟!

عمتو: على إيه يا بنتي ! ومالك فرحانة كدا، دا أنت هتوقفي حالك، ومافيش عرسان هتجيلك.

أسماء بابتسامة باردة: الجواز دا ياعمتو قسمة ونصيب، وإرادة ربنا فوق كل شيء، وأنا راضية بحُكمه، بركيلي أنت بس.

عمتو/هيكبرك النقاب دا، ويبقى شكلك بايخ.

أسماء بضحكة صفرا كده: دا أنا قمر ياعمتو، هو فيه قمر جماله بيتخبى، هههههه بهزر،

ياعمتو ياحبيبتي النقاب دا هيحافظ عليا وهيخبيني من عيون مجتمع فاسد، وهيصوني زي الجوهرة الغالية مش بنخبيها في علبة شيك كدا وغالية من التراب أهو النقاب هيعمل كدا.

*واسترسلت أسماء في كلامها عن النقاب.*

لو على الكُبر؛ فهو هيكبرني فعلًا بس مقامًا عند ربنا، وقرب منه، وهو دا هدفي.

عمتو: هيخنقك ولا هتخرجي ولا هتعرفي تاكلي في مطعم، ولا تروحي فرح ليه كدا يابنتي، عيشي سنك دلوقت.

أسماء بابتسامة وتنهيدة:

ياست الكل لو على الخنقة؛ فأنا في نقابي هحس إني ملكة متوجة بنقابها، بعشقة، وبحس بكياني وأنا لبساه، ولو على الخروجات، والإفراج، والحاجات دي، عمره ما هيمنعني طالما الخروجة كلها في إطار شرعي، يبقى مافيش مشكلة.

عمتو: والحر، والصيف، والعرق.

أسماء: خلااص ياعمتوو

قل إن جهنم أشد حرًا.

عمتو: وهتلبسيه إزاي يا ست سمكة.

أسماء بضحك كتير:

على راسي كدهووه وضحكت.

عمتو ضحكت وقالت: لأ مش مقتنعة.

أسماء: ياعمتو أنا اللي هلبسوا مش أنتِ، وضحك كتير بينهم.

عمتو: خايفة عليكِ من الطريق التشدد ده.

أسماء: عمر النقاب أو الخِمار أو اللحيه أو تقصير الجلبيه أو أي مظهر من مظاهر الدين مكانت تشدد، دا أُسس الدين، وسُنة عن الرسول ياعمتو، ولازم نعمل دا.

ماما في فخر: الله أكبر على بنتي، عرفت أربي، وأكبر ياولاد.

أسماء: الطريق طويل يا ماما ربنا يقدرني.

عمتو: خمارك طويل مش كفاية، لازم النقاب دا.

أسماء بفرح: نطول الخمار أكثر بإذن الله تحت النقاب، أما عن النقاب؛ فمش زيادة ولا حاجة، النقاب إذا كان فرضًا؛ فقد أطعت الله ورسوله، وإذا كان سنه؛ فقد تشبهت بأمهات المؤمنين، وإذا كان فضل؛ فقد أصبحت من أهل الفضل، والحمد لله

*ورفعت أسماء يداها تشكر ربها على فضله ونعمته.*

اللهم أدم على نعمته، وفضله، وأن القيك به يوم القيامة.

 ماما: آمين يابنتي، ربنا يهديكم كمان وكمان.

أسماء: النقاب بيريي، والله بيريي جدًا، بيخليكِ تتغيري فعلًا، بتتغيري 360 درجة، معنى أنه بيخليكِ تتكسفي تعملي أي حاجة غلط، وفيه حاجات كتير أوي حرام، ومش بتليق بيه هتبطلييها خالص، أنا متاكدة بإذن الله لما ألبسه هكون واحدة جديدة خالص، كفاية على شعور الستر، كفاية إني متشبه بأمهات المؤمنين، وربنا بفضل النقاب يجمعني بهم في جنة عرضها السموات والأرض.

عمتو: طيب ياست أسماء، فين دليلك من القرآن عليه، ليه تفرضيه على نفسك.

أسماء بحب:

ربنا عز وجل قال في كتابه: "يَا أَيُّهَا النَّبِيُّ قُل لِّأَزْوَاجِكَ وَبَنَاتِكَ وَنِسَاءِ الْمُؤْمِنِينَ يُدْنِينَ عَلَيْهِنَّ مِن جَلَابِيبِهِنَّ ۚ ذَٰلِكَ أَدْنَىٰ أَن يُعْرَفْنَ فَلَا يُؤْذَيْنَ ۗ وَكَانَ اللَّهُ غَفُورًا رَّحِيمًا"  

الآية مفسرة نفسها أهي ياعمتو.

عمتو: جزاكِ الله خير يا أسماء يابنتي، وربنا يراضيكِ، ويثبتك يارب، بس ممكن تكلميني شوية كمان عن جمال النقاب.

*أسماء بحب وانبهار حاضر ياعمتو*

النقاب تاج وقارٍ، ولا ترتديه إلا الأقمار، ويزيدهُنَّ جمالًا على جمالهنَّ ياعمتو، وبعدين بابا أغلى، وأعظم من أن يذوق عذابًا فـالأخرة بسبب ضيق ملابسي، أو سُوء خُلقي، ياعمتو، خُلقنا للفضفاض، وخُلق الفضفاض لـنا، والله ما زادنا الفضفاض إلا سترًا، ونورًا، وجمالًا.

ماما: أكيد صحباتك اللي شجعوكِ على قرارك دا يا بنتي صح؟

أسماء بعزة وفخر: الصديق الصالح دا أجمل نعمة ممكن الإنسان يفوز بيها، وأنا فُزت بيها الحمدلله، صحباتي كانوا داعم ليا في قراري الحمدلله.

ماما/ماشاءالله، ونعم الصحبة.

عمتو: الف مبروك يا أسماء، وربنا يثبتك، ويحفظلك صحباتك المُشجعات على طريق الحق، وطريق الله.

أسماء بضحك كتير: أحلى دعاء دا ياعمتو ولا ايه من وقت ما اتكلمنا، أسماء بصوت حاني:

مافيش زي صحابي فعلًا المُلهمات.

*فالصديق خير مُعين.* 

*وهُنا تذكرت أسماء تلك الكلمات عن فضل الصديق الصالح في حياتنا (ليس الصديق فقط من يجلس معك، من يضحك معك، من يأكل معك؛ الصديق هو الذي حين تُحادثه يرتفع رصيد إيمانك بحديثه، الذي إذا جالسته صغُر شأن الدنيا في عينك وتعلّقت بالله من يشدّ بيدك إلى الخير، من يقوّم اعوجاجك حين يراك تميل عن الطريق، من يُتمتم لك بالدعوات غيبًا في جنح الليل.)*

#أسماء_إبراهيم