(ياما قالوا)
بيقولوا لو هتعيش
فـ إختار تعيش واحدك
وخاف عليك م الناس
واوعى العشم ياخدك
قطر الصحاب يا جميل
مفيهوش جدع وأصيل
لو يوم عليه هتميل
هيتقسم ضهرك
بيقولوا ع الخِلّان
أصل الخراب كُله
صاحب يبيع صاحبُه
وصاحب يخون ضِلُه
متقولش مش كلهم
صاحبك أكيد زيهم
لو يوم هتحتاج لهم
متشوفش غير ذلُه
بيقولوا ناس تانيين
حرّص ولا تخوِّن
صاحبك جدع وأمين؟
يبقا عليه تهوِّن
قطر الصحاب حمَّال
فيه م الصحاب أشكال
ف إختار خليل شيّال
م الأصل متكوِّن
شيماء_البنا
القسم:
شعر