بدأت حياتي بقلم كتب اللي جاي فيها
اسمي وكمان قسمتي مكتوبه أكون ليها
وف النهايه كتاب يحكم بأعمالي
أتمنى تاخده يميني والجنه أعيش فيها
أصل الكتاب مش ورق ولا حبر ولا ألوان
دا كتاب يضل طريق
وكتاب يكونلي رفيق
وكتاب ف وقت الضيق
يبقالي أحلى مكان
كتاب قريته إتكتب بدموع عيون عشاق
يحكي الآهات والوجع ويوصف الأشواق
يوجع قلوب الناس وكل من يقراه
وكأنه كان مكتوب بالدم وقت فراق
يا ابني الكتب أرزاق ونعمه للإنسان
فـ اختار كتاب شبهك
يعرف يصون سرك
لـكتاب يجيب أجلك
دي الخدعة فـ العنوان
هتقول فـ يوم هقرا لكن يادوب كتابين
ف تبدأ تقرا، تقرا فـ تقفِّل الألفين
وقبل ما تِقفل كتابك هتدعي ع الكاتب
وتقوله ليه تنهي، أكتب كمان جزئين
ورواية تجر قصة تجر ألف كتاب كمان
دا كتاب يجيب فِكره
وكتاب يشيل ذكرى
وكتاب يكون بُكره
أقربلي من إنسان
شيماء_البنا
القسم:
شعر