أيام بتمر وراها شهور
والسنه بتجر وراها كتير
والوقت بيجري وبيعدي
وكأنه طلعله جناح بيطير
الوقت الحلو بيجري أوام
والمُر بيفضل يوجعنا
بننام ونقوم ويا الأحلام
ونحس إن الوقت بتاعنا
فجأه تلاقي الوقت الباقي
خلاص مبقاش...
ف تفوق من حلمك وتلاقي
الواقع أصلًا حلم مجاش
الدنيا بابين
تدخل من باب تخرج من باب
وما بينهم أيام مجهوله
ف يا اللي عامل للدنيا حساب
دي الدنيا معادله ومقفوله
وكأننا عايشين ف متاهه
شايلين الهم ودايرين بيه
ضيعنا الآخره ونسيناها
وحابين الدنيا، طب على ايه؟
الدنيا أساسًا كام ثانية
وف ثانية تلاقي الشمس تغيب
ربك قال موعدنا الصبح
أليس الصبح بقريب؟
شيماء_البنا
القسم:
شعر