واقع محتوم أكيد لازم هعيش وياه
طريق مسدود ملوش منفذ واسمه حياه
ما أنا طول عمري جنب الحيط عايش راضي
لا يوم ضعفت ولا بكيت وقولت الأه
راجل غلبان أنا وشقيان عشان قُوتِي
وباكل لو رغيف ناشف
وحامد شاكر المولىٰ
كرامتي هي أول شئ أشتريه بموتي
وبحرم نفسي م النعمة
وبقول: أصل العيال أولىٰ
حُرِمت العيش على أرضي
حُرِمت دفاعي عن عرضي
مخدش غير يادوب لُقمة
سكت وقولت أنا مرضي
بعيش العمر بالصدفة
وبضحك بس من غُلبي
تعبت ودنيتي عارفة
لكني بداري على تعبي
شقيت من صغري واتعلمت
أحب بلادي وأفديها
وهصبر مهما اتألمت
منا عايش ف أراضيها
مواطن عادي م العامة
لكني أسد فـ وقت الجد
وروحي فداكي يا أُمه
فدا نيلك فدا للأرض
زرعت الأرض بـ اديا
بروحي ودمي برويها
كـ سمكة عايشة ف المية
ووحده النيل هيحميها
مواطن عاش بدون واسطة
لا عندي لا جاه ولا سلطة
وراضي بظلم وإهانه
بحبك وهي دي الورطة
ولما اتهانتي يا بلادي
دافعت بروح ودم وقلب
صبرت سنين ودا العادي
مخدتش منها غير الغُلب
ضعيف وبلادي دي قويه
وبقوى لو فـ يوم ضعفت
بدافع عنها بعنيا
وياريتها بالكلام شَكَرت
أصول العيشة فـ بلادي تكون فرعون
معاك م القوة ما يكفي وكنز قارون
تكون قادر،
معاك سلطة
تقول اسمك بدون واسطة
تكون سلطان تقول فيكون
وصوتك يسمعوه ف مالطة
أصول العيشة فـ بلادي تكون رافض تعيش هامش
اصول العيشة ف بلادي تكون رافض تعيش غلطة
#shaimaa_mohamed
#غريب_في_وطني