(المسجون)
أنا المسجون ف سجن صنعته من وجعي
أنا التعبان من الماضي وم الحاضر
أنا المجنون وعايش أداري على دمعي
وع الجدران كتبت وقولت أنا قادر
رسمت وشوش بتضحكلي
رسمت قلوب من الصافية
كذبت وقولت أنا مبسوط
لكني عايشها بالعافيه
كتبت آهات
كتبت دموع وأمنيات
رسمت جروح مبتخفش
رسمت سكات
رسمت طيور بتتألم بدون جناحات
أنا المسجون
أنا السجان
ف سجن دموعي جدرانه
أنا المسجون
وع الجدران
كتبت غريب ف أوطانه
كتبت وحيد ومش ذنبي أعيش مسجون
كتبت وقولت أنا تعبان... منيش مجنون
سكنت الوحدة والضلمة مع إني بخاف
وخوفي الأكبر إني أبقا وحيد ف الكون
حياتي سواد بدون ألوان
رضيت بالوحدة ووجعها
يجوز مظلوم بجد بس عشان
وحيد ف الدنيا ووسعها
يجوز مذنب
يجوز مجنون
لكني بجد مش طايق أعيش ف الدنيا بطباعها
الشاعرة: شيماء البنا
القسم:
شعر