(تأثير وجودك)
بجيلك طاقتي مطفية
يادوب باللمسة تحييني
وإيدك ماسكة ف إيديا
تفر الدمعة من عيني
بتمسح دمعتي ب إيدك
وتحضن قلبي ف أطمن
تجدد روحي من تاني
وف ثواني بترضيني
بجيلك خايفة وبعاني
بنظرة عين بتسحرني
وجودك وحده قواني
وجودك وحده طمني
ف حضنك قلبي ما بيحزن
ف حضنك قادرة أكون أحسن
وقول لي ازاي هخاف أصلًا
ولما بخاف... بتحضني
بحبك كل يوم أكتر
ومهما العمر هيطول
هزيد ف الحب وهكتّر
هحبك تاني م الأول
ومهما زعلنا يتمادى
ف لحظه الشوق يجمعنا
بنتجمع وكالعادة
بنرجع أحلى م الأول
هنرجع مهما نتفارق
ونبقا لبعض من تاني
هنتعاتب ونتخانق
وننسى الماضي ف ثواني
ف حضنك بهدى وبسلّم
من غير حتى ما أتكلم
ف حضنك قادرة أطمن
ف حضنك عمري ما بعاني
_شيماء_البنا
القسم:
شعر