آهو جه تاني الشتا
وجاب معاه البرد
ياخد دفا الأيام
وبهجة جمال الورد
يقال عليه إنه
فصل الوقوع ف الحب
ساحر قلوب عشاق
دابت حنين للقرب
يقال عليه إنه
للحزن مع إنه
لا عمره جه بدموع
ولا اكتئاب ضِمنه
لا عمره كان للوجع
ولا للحنين إن رجع
ولا كان ف ليلُه هدوء
ولا نور، دفا، أو شبع
عدّى علينا الشتا
وكإنه كان إنسان
سلّم على قلبنا
وخدنا بالأحضان
جايب معاه ذكرى
من عُمر عدى وفات
جايز تكون فِكرة
أو نظرة ويا سكات
جايب معاه الأمل
ييحي اللي مات فينا
جايب معاه المطر
يروي ف أراضينا
ف إزاي تقولوا كئيب
أو جاي معاه الحزن
دا كفايه إنه يسيب
ف بيوتنا ريحة بُن
وإزاي تقولوا كئيب
مع شاي منعنع سخن
أو مج شاي بحليب
مع مخبوزات الفرن؟!
_شيماء_البنا
القسم:
شعر