قصيدة أخر سلام




ايه يا حلوة 

غايبة عني ليكي مُده 

سايبه جوا القلب هده 

من سنين مبتسأليش

سايبه ركن ف قلبي بَعدك ربى ريش

مش عوايدك ..

مش لسانك مرة قالي

استحاله اعيش فبُعدك لو يومين !

لسه وحدي يا حبيبتي.. 

من يجيلي اربع سنين

انتي فين ؟!

فين هزارك .. وحكياتك

تفسيراتك ؟!

لسة عندي نكتة بايخه

بنسى وارميها ف شاتك

غبتي ليه ؟!

مبسوطة بيه !

ولا يعني انا كنت طير

يوم ما اقرر ادي شيء

اهديكي قلبي ف تدبحيه !


قولي لية ..

قولي ليه لساكي صابرة

ع الفراق !

قلبي داق م الوحشة كوم

مرجعتليش 

عمال بيشحت ف الصحاب

علشان يعيش !


وانتي عندك ..

كل ما يجرد مشاعره 

لاجل انه ينول رضاكي

كل ما يصرّح "بحبك"

كل ما بتغدر سماكي 

تبقي مطرة فعز ليله 

عريان بيشحت ف الدفا م البرد

عريان يا زينه/ قومي افتحيله !

واسمحيله ..

انه يحيا فيكي مرة بس تاني

يومها عينك راح تقولي

كل شيء جوايا؛ كلي

لسه دايب فيك يا خلي

انت وحدك يا حبيبي

اااه يا زينه

كنتي قولي وانتي ماشية

لو تغيب الروح تغيبي !   

كنتي سيبي بعد منك 

ذكرى حلوة وقلب خام

عشت أجمّل عمر فيكي

سبتي ليا ١٠٠ رصاصة ياحبيبتي و١٠٠ لجام

ملعون ابوه الحب ليكي

خلى قلبي ازاي شاريكي

وانتي عينك كيف نشان

كل ما يمر الشوارع

تصطاده ذكرى من اللي كان

كل ما تصادفه الاماكن

بيموت ساعتها من السكات

عمال بيسأل فين حياتي ؟!

فين طلتك وسط البنات 

ااه يازينه شوفي خيبتي

قلبي جنزر يا حبيبتي 

م الثبات على حبك انتي

تقولش راجعه !

تقولش بعد العمر كله

يلقى قلبي فيكي ضله

وتبقي احلى شيء فاضله

ويحيا بيكي !

اه ياعيني .. 

كل هذا الحزن يعني عشان شاريكي !

#ابانوب_رفعت

#A_R_T

إرسال تعليق

أحدث أقدم