في ناس بتمشي زي أي غريب
ويومين يمروا ويصبحوا ذكرى
وفي حد لو فكرنا إنه يغيب
تقف الحياة وتسأل إزاي هعيش بكرة؟
وإزاي يمر اليوم وميتذكرش اسمه!
هتشوف صورته ف كل مكان
هتشوفه ف الشارع وف أي حد جميل
هتشوفه ف الوردة لو يوم عليها تميل
هتشوفه ف السما، هتشوفه ف النجمة
وهتفتكر إنه لو قال يادوب كلمة
عينيك هيبتسموا
هيطول عليك العمر وكأنه لسه قريب
حاضر معاك دايما بروحه مش جسمه
يا ناشر ف الظلام نورك
وشايف كل شئ أحلى
يا هادم للحزين سورك
وقلبك صافي ولا أحلى
يا أخ وأب وابن وخال
يا جبل للهموم شيال
يا سايب دنيتي وماشي
وفكرك تتنسى؟ دا محال
لساك هتوحشني مهما الغياب هيطول
عشت الحياة كلها بقلب صافي رقيق
لو يتذكر اسمك بدعي بشوق وبقول
رحم الإله الاب، أخ، وابن بار وصديق
ساب الفراق يحرق قلوب حباه
تبكي العيون م الفرقة على قبره
دمع ببكاء يعقوب لما ابيضت عيناه
والقلب آهو صابر مبينتهيش صبره
ولابد يوم عن يوم عيني تبطل بكا
وجع الفراق محتوم لكن الفؤاد اشتكى
الموت دا شئ مكتوب والكل هيشوفه
خبر الوفاة قاتل والضربة كانت مهلكة
رب القلوب علام بالقلب وعذابة
اجعل لروحه سلام والراحة ف ترابه
راضي بقضاء ربنا ولكني مش ناسي
ساب الدنيا وهجرنا ولا قلبي يوم سابه
لو حد يوم زاره ع القبر حطوا زهور
وتصدقوا عنه واقرأوا له م القرآن
كان قلبه زي الطير رحيم جميل وصبور
ادعوله بالرحمة والستر والغفران
ادعوله من قلبكم يجعل ف قبره النور
وادعولنا من قلبكم بالصبر والسلوان
_شيماء_البنا