منذ فترة وانا أجلس مع جدتي فى منزلها، حيث الاشجار، والمساحات الخضراء، وكل يوم أجلس مع جدتي لتعطيني بعد النصائح، فعن ماذا ستكون نصيحة اليوم يا ترى؟
جدتي: ملاك، يااا ملاك.
ملاك: ها يا ستي؟
جدتي: يلا علشان معاد القاعده بتاعتنا.
ملاك: تعرفي بقا يا ستي ان دا احلى وقت فى اليوم كله.
جدتي: لى بقا يا ست ملاك؟
ملاك: لان نصايحك حلوة اوى يا ستي وانا بحب اسمعها.
جدتي: اهم حاجه تسمعيها وتنفيذيها اذا كان دلوقتي او فى المستقبل يا ملاك.
ملاك: اكيد، الحوار هيكون عن اى انهارده؟
جدتي: انهارده الحوار هيكون عن غيوم الحياة.
ملاك: غيوم الحياة؟ در زى الغيوم اللى فى السما كدا؟
جدتي: حاجه زى كدا.
ملاك: ازاى!
جدتي: طبعا انتى بتشوفى فى السما غيوم صافيه واوقات غيوم سوده كدا صح؟
ملاك: ايوا يا ستى فعلا، بس اى العلاقه.
جدتي: اهو بظبط كدا، غيوم الحياة زى الغيوم دى، لان زى ما فيه غيوم صافيه زى ما فيه حاجات حلوة فى الحياة، وزى ما فيه غيوم سوده زى ما فيه حاجات وحشه فى الحياة.
ملاك: طب زى الغيوم الصافيه يا ستي؟
جدتى: زى الصدق والثقه والامان حفظ السر.
ملاك: طب الغيوم السوده؟
جدتي: الكدب والخيانة والغدر والخداع وعدم الاحتفاظ بالسر يا بنتى.
ملاك: اممم طب هنبدأ باى يا ستى؟
جدتى: اسمعى يا بنتى لو حياتك اتبنت على الصدق والثقه والامان وحفظ السر اذا كان دلوقتي او بعد كدا وانتى زوجه وام هتعيشي احلى ايام حياتك اذا كان مع جوزك او عيالك، فوق دا كله ربنا هيباركلك فى حياتك لان دى الحاجات اللى ربنا امرنا بيها، أما بقا لو قامت على الكذب والخيانة والغدر والخداع فكدا حياتك هتبقى خراب فى خراب دا غير ان ربنا هيكون غضبان عليكي.
ملاك: طب نفترض اننا عملنا حاجه من الغيوم السوده دى، هل ربنا هيسامحنا؟
جدتى:طبعا ربنا هيسامحك لو توبتى من الذنب دا ومرجعتلوش تانى ربنا اسمه التواب.
ملاك: حلو تشبيهك بالغيوم يا ستي.
جدتي: علشان تكون سلسه وتفهميها يا بنتى، فهمتى نصيحة انهارده يا ملاك.
ملاك: فهمتها يا ستي.
عيشوا حياة صادقه ومريحه.
بقلم: داليا علاء "الإمبراطورة"